സമയം 

ഒരേ സമയം 

അമ്മയും  കുഞ്ഞുമാവുക 

ഒരേ  സമയം 

ഡോക്ടറും  രോഗിയുമാവുക 

ഒരേസമയം 

പഠിതാവും  പാഠപുസ്തകവുമാവുക 

ഒരേ  സമയം 

തെറ്റും  ശരിയുമാവുക 

യു  ട്യൂബ്  നോക്കി പ്രസവിച്ച  കുട്ടി 

എങ്ങനെയാവും 

ആ  സമയത്തിലൂടെ 

കടന്നു  പോയിട്ടുണ്ടാവുക .

മധുരം 

നീ  എൻറെ 

പഞ്ചസാര .

മധുരിച്ച്  

മധുരിച്ച്  

നാം 

ഭേദിച്ച 

അതിർവരമ്പുകൾ .

തിരിച്ചു  വരവുകൾ 

ഉടലാണ്ടു പോയിട്ടും  വെയിലിനെ 

മധുരമായ്  പൂക്കുകയാണ്‌ 

ചെടി .

പൊടിക്കാറ്റിട്ട്  ഇതൾമിനുക്കുകയാണ് 

മഴ 

ചിറകുകളിലെ  ഭാരം 

എത്രമനോഹരമായാണ്  

ഇതളുകൾ  കുടഞ്ഞുകളയുന്നത്‌ .

കാർമേഘത്തിലേക്കൊരു   മയിൽ‌പ്പീലി 

വിടരുന്നപോൽ ;

മിടിപ്പുകളിലോരോന്നിലും 

പീലിക്കണ്ണഴക് .

ഹൃദയങ്ങളിലേക്ക്  വേരാഴ്ന്നു വളരുന്നു 

കരളുറപ്പുള്ള  ചില 

തിരിച്ചുവരവുകൾ 

 ഇരുതല  മൂർച്ച 

പൊടുന്നനെ  അയാൾക്ക് 

രണ്ടുതലകൾ  രൂപപ്പെട്ടു .

ഒരുതല  ഒരുദൈവത്തിനും 

മറ്റേതല  മറ്റൊരു  ദൈവത്തിനും  വേണ്ടി 

വാദിച്ചു ---വാളെടുത്തു .

പയ്യെ ..പയ്യെ

മതങ്ങൾ മൂർച്ചകൂട്ടിയ  തലച്ചോറുകൾ 

അയാളെ  

പിളർന്ന് ---പിളർന്ന് 

ചോര  വാർന്ന് .

;മനുഷ്യൻ;  ഒരുതോന്നൽ 

മാത്രമാണ് .

മതങ്ങൾ 

മലക്കം മറിയുന്ന 

സത്യവും .

കനൽ 

ഉണരുക ജ്വലിക്കുക 

കനൽ കണക്കെ  നീങ്ങുക 

ഇനിയുമീ  വിവേചനം 

പൊറുക്കയില്ല 

ചൊല്ലുക .

അടിമപോൽ വിറച്ചുനിന്ന 

വഴികളെ  മറക്കുക 

അടിയുറച്ചു  വിശ്വസിച്ചു 

നമ്മൾതന്നെ  പൊരുതുക .

കൂടുതൽ  കരുത്തരായ് 

മടങ്ങിവന്നിടാം .

നോവുകൾ  തെളിച്ചെടുത്ത 

പന്തമായിടാം 

വാക്കുകൾക്ക്  മൂർച്ചകൂട്ടി 

നീതിതേടിടാം .

വാശിയോടെ  നമ്മൾതുല്യരെന്ന് 

കാട്ടിടാം .

എത്ര  കാൽച്ചുവട്ടിൽ  നമ്മൾ 

വീണുരുണ്ടലിഞ്ഞതാ 

എത്രകാതുകൾ  നമുക്കായ് 

കേട്ടതായ്  നടിച്ചതാ 

എങ്ങുമെത്തുകില്ല നമ്മളെന്നൊരുൾ 

പിടച്ചിലിൽ 

എത്രകാലമീവിഷാദ  ഭാവമായിരുണ്ടതാ .

ഉണരുക  ജ്വലിക്കുക 

കനൽകണക്കെ  നീങ്ങുക .

ഉരുകിവെന്ത വഴികളിൽ 

ഉറച്ചുറഞ്ഞു തുള്ളുക 

പ്രണയപൂർവം 

എല്ലാ  ഉണർവ്വുകളേയും 

ഒരേയൊരു  വികാരത്തിൽ 

തളച്ച് 

ആകാശത്തോളം  വലിയ 

സ്വപ്നങ്ങളെ 

അണുവിനോളം  ചെറിയ ഇരുട്ടുകളിൽ 

മടക്കിയൊതുക്കിവയ്ക്കുന്നു .

ബന്ധങ്ങൾ 

കാരിരുമ്പിന്റെ  കരുത്തുള്ള 

ബന്ധങ്ങൾ 

മുറിയുമ്പോൾ  

തീ  പാറുന്നവ .