രാത്രിയുടെ  ചീള് .

വവ്വാൽ  തലകീഴായി  തൂങ്ങിക്കിടക്കുന്നു 

നാളേക്കായി   ഉണക്കാനിട്ടൊരു 

കറുത്ത  തൂവാല   

രാത്രിയുടെ  ചീള് 

ഏറ്റവും  ഉയരംകൂടിയ  തേക്കിന്റെ 

ഏറ്റവും  ഉയരത്ത് .

ഡിസംബറിന്റെ  തണുപ്പിലേക്കത് 

ഊരി  വീണേക്കുമോ --ഇല്ല 

കാറ്റിന്റെ ഒക്കത്ത്

തങ്ങി  നിൽപ്പുണ്ട് .

കാക്കകൾ 

പകലിലാണ്  ജീവിക്കുന്നത് .

രാത്രിയെ  അവർ 

കൊത്തിവലിക്കാൻ  നോക്കുന്നു .

വവ്വാലിന്റെ  ശബ്ദ0

മനുഷ്യന്  താങ്ങാനാവാത്ത  ഉയർന്ന ആവൃത്തി 

അങ്ങിങ്ങു  ചീറ്റിതെറിച്ച് .

ആളുകൾ  കോടാലിയുമായെത്തുന്നു 

ഇരുട്ടിനെ  വെട്ടിത്തെളിക്കുന്നു 

പൊള്ളുന്ന  പകലിനെ 

മടിയിലിട്ട്  കൊഞ്ചിക്കുന്നു 

 വളർത്തു  ദോഷം 

ഉത്തരവാദിത്വമില്ലാത്തൊരു   വീട്ടമ്മയാകാൻ 

ആഗ്രഹമില്ലാഞ്ഞിട്ടല്ല 

അതിനു  ശ്രമിക്കുമ്പോഴെല്ലാം 

എൻറെ  ഉമ്മ 

ഉള്ളിൽ  കയറിയിരിക്കുമ്പോലെ 

തോന്നും 

.

പിന്നെ 

എത്ര ചെയ്താലും  പണിതീരാതെ 

എത്ര  സ്നേഹിച്ചാലും  മതിവരാതെ 

എത്ര  പ്രാർത്ഥിച്ചാലും  മനസ്സമാധാനം  കിട്ടാതെ 

എത്ര  ശാസിച്ചാലും  തൃപ്തി യാകാതെ 

ഞാൻ  തിളച്ചു  മറിഞ്ഞു കൊണ്ടേയിരിക്കും .

വളർത്തു  ദോഷം എന്ന്  ഇതിനേയും 

ഒന്ന്  പേരിട്ട്  വിളിച്ചു  തരാമോ ?

പട്ടം 

ഒരു  ചിരി 

ഒരു  കളി 

ഒരു  പാട്ട് 

എത്രമാത്രം  ശ്രദ്ധിക്കപ്പെടാമെന്ന് 

ഒരിക്കൽ 

ഭ്രാന്തനായി  ജീവിച്ചവന് 

മാത്രമേ  അറിയൂ .

കണ്ടില്ലേ 

മാറ്റങ്ങളോരോന്നും 

ചങ്ങലകളെ  കോർക്കുന്നത് .

നോട്ടങ്ങളോരോന്നും അകലങ്ങളായി  പരിണമിക്കുന്നത് 

മൗനങ്ങൾ  ധിക്കാരമായും 

മോഹങ്ങൾ  അഹങ്കാരമായും 

മനസ്സിനെ വരിഞ്ഞുമുറുക്കി 

മറവിയെ 

കൊത്തുന്നത് .

ഒരു  ചിരി 

ഒരു  കളി 

ഒരു  പാട്ട് 

എത്രമാത്രം  ശ്രദ്ധിക്കപ്പെടേണ്ടതുണ്ടെന്ന്   

ഒരിക്കൽ  ഭ്രാന്തനായി  ജീവിച്ചവൻറെ 

കൂടെ  ജീവിച്ചവർക്ക് 

മാത്രമേ  അറിയൂ .

ഒരു  പട്ടത്തിനായ് 

പൊട്ടാൻ  പാകപ്പെട്ട് 

വലിഞ്ഞു  പിണഞ്ഞു 

കുരുക്കു  വീഴുന്നവർ .

നടാടെ 

അമ്മിപോലെ 

ഉരലുപോലെ 

മാറാല പിടിച്ചു 

കിടപ്പുണ്ട് 

നടാടെ .

നടാടത്തെ  പെര 

നടാടത്തെ  പേറ് 

നടാടെ  കുത്ത്യേ  കെണറ് 

നടാടെ  കിട്ട്യേ ശമ്പളം 

നടാടെ കണ്ട പെണ്ണ് 

ഓൻ  ദുബായീന്ന് 

നടാടെ  കൊണ്ടന്ന  സാരി 

അങ്ങനെ 

നടാടെ  കൊണ്ട് 

തുടച്ചു മിനുക്കിയിരുന്ന 

മറക്കാനിഷ്ടപ്പെടാത്ത 

നല്ലോർമ്മകൾ 

(നടാടെ ..ആദ്യത്തെ) 































കേട്ടു ...കേട്ടു ..കേട്ടുകൊണ്ടിരിക്കുന്നു 

നിങ്ങളുടെ  സങ്കടങ്ങൾ 

എനിക്കു വച്ച് 

നീട്ടുന്നു .

എൻറെ സന്തോഷങ്ങളെ 

കൊത്തിയെടുത്തു

പറന്നുകളയുന്നു .

പ്ലിങ്

പ്ലിങ് 

രമേശ്  , സുമേഷ് 

എന്റെ  വിജയത്തിന് 

ഇടം .വലം  

ഇവരുടെ  പേരുകൾ 

എത്ര പ്രണയത്തോടെയാണ്  ഞാൻ 

നിങ്ങൾക്കു  മുമ്പിൽ 

അവതരിപ്പിക്കുന്നതെന്നോ  .

ഇവരില്ലെങ്കിൽ 

ഇരുണ്ടു പോയേക്കാമായിരുന്ന 

വികല ദിനങ്ങളെ 

എത്ര  തെളിച്ചത്തോടെയാണ്  ഞാൻ 

നിങ്ങൾക്കായി 

ചിരിച്ചു  കാട്ടുന്നതെന്നോ .

വിഴുപ്പലക്കാനും 

പാത്രം  കഴുകാനും 

യന്ത്രങ്ങൾ  തന്നെയാണ്  നല്ലത് ;

അവയ്ക്ക്  ആൺ പേരുകളും 

എനമി  എ  ഹെഡ്            സമീറ  പി .പി 

വീടുകളിലേക്ക് 
കയറുമ്പോൾ
എങ്ങും  
കൊല്ലാനുള്ള 
ആക്രോശമാണ് ;
രക്ഷപ്പെടാനുള്ള 
മുറവിളികളും .

എങ്കിലും 
മക്കൾ  പുറത്തിറങ്ങുന്നില്ലല്ലോ 
കൊറോണപിടിക്കില്ലല്ലോ 
എന്നൊരാശ്വാസമുണ്ടമ്മമാർക്ക് .

അറിയാഞ്ഞിട്ടല്ല 
ഉന്നംപിടിച്ചുന്നംപിടിച്ച് 
കണ്ണുകൾ 
വിരൽ  തുമ്പിലൂടൂർന്നു 
പൊട്ടുന്നത് .

അതിർത്തി  ലംഘിച്ചു 
തെറിച്ചുവീഴുന്ന  തെറികൾ 
അങ്ങിങ്ങു  
മുളച്ചു  പൊങ്ങുന്നത് .

സമയത്തെ 
വെടിവച്ച് 
വെടിവച്ച് 
ജയങ്ങളെ 
തോൽവി 
പുതപ്പിക്കുന്നത് .

എനമി  എ  ഹെഡ് 

സംശയിക്കേണ്ട, 
ഒച്ചവെക്കുന്നതും 
ഓടിക്കിതക്കുന്നതും 
അമ്മതന്നെയാണ് 
നെഞ്ചിലേക്കുതന്നെ 
നിറയൊഴിച്ചേക്കുക .

വ്യാഴനഷ്ടം 

ഒരു  വ്യാഴാഴ്ച്ച

എന്റെ  കയ്യിൽ  നിന്നും 

നഷ്ടപ്പെട്ടിട്ടുണ്ട് .

വ്യാഴത്തെക്കുള്ള  പ്ലാനുകൾ 

സ്നേഹം 

സൗഹൃദം 

പ്രണയം 

ദുഃഖം 

എല്ലാമെല്ലാം .

ഞാനറിഞ്ഞിരുന്നില്ല :

റാണിയാണ് പറഞ്ഞത് 

ഇന്ന്  വെള്ളിയാഴ്ചയാണെന്ന് 

ഇനിയിപ്പോ  ആർക്കെങ്കിലും 

കിട്ടിയിട്ടുണ്ടേൽ 

തിരിച്ചു  തരേണ്ട . 

ആ  പണിയൊക്കെ 

എനിക്ക്  ലാഭമായീന്ന് .........

അല്ല .......പിന്നെ .

മധുരം പേറുന്നവൻ . 

അയാളുടെ  കണ്ണുകൾക്ക് 

കാട്ടുതേനിൻറെ 

കത്തലാണ് 

പുഞ്ചിരിക്ക് 

തേനിനേക്കാൾ 

മധുരവും .

നഗ്നമായ 

പാദങ്ങൾ കൊണ്ട് 

എന്റെ 

വീട്ടുമുറ്റത്തെ 

അനുഗ്രഹിച്ചിരുന്ന 

ഇപ്പോൾ ജീവിച്ചിരിപ്പുള്ള 

ഒരേ ഒരു 

മനുഷ്യജീവിയാണയാൾ .

ഭൂമിയിലേക്ക് 

വേരാഴ്ന്നുപോയിട്ടുണ്ടെന്നു -

തോന്നിപ്പിക്കുമാറ് 

അയാളുടെ  ഞരമ്പുകളിലൊരു 

കാട്ടുചോല 

തിങ്ങി  നിൽപ്പുണ്ട് .

വർഷങ്ങളായി 

കാടിന്റെ 

മണവും 

നനവും 

കരുതലും 

അയാളിലൂടെയാണ് 

ഞങ്ങളറിഞ്ഞത് .

ചൂടിനെയോ ,

തണുപ്പിനേയോ 

-മഴയേയോ 

അയാൾ 

ഗൗനിക്കാറില്ല 

മധുരം നുണഞ്ഞ 

കുഞ്ഞുങ്ങളെപ്പോലെ -

മധുരത്താൽ  വീർത്ത 

കുഞ്ഞനുറുമ്പിനെപ്പോലെ 

അവയെല്ലാം  അയാളാൽ 

അത്രയേറെ 

വശീകരിക്കപ്പെട്ടിരുന്നു .

ഇത്രനാൾ 

അയാളുടെ ഒഴുക്കിന് 

തടസ്സം  നിൽക്കുന്ന 

ഒന്നും  ഭൂമിയിൽ 

സംഭവിച്ചിട്ടില്ലായിരുന്നു .

മധുരമൊഴിഞ്ഞപ്പോൾ 

കാടൊഴിഞ്ഞപോലെ -ശ്വാസം നിലച്ചപോലെ .

അയാളറിയുന്നുണ്ടാവുമോ 

ഒരു ഫോൺ നമ്പർപോലും 

വാങ്ങിച്ചുവക്കേണ്ടി  വന്നിട്ടില്ലാത്ത 

നിറവിനെ 

കണ്ണീരുപ്പാൽ ഞങ്ങൾ 

കാത്തിരിക്കുന്നത് .

വിവേചനം 

വി വേചനങ്ങൾക്ക് 

അനുഭവിക്കുന്നവനു  മാത്രം 

മനസ്സിലാകുന്നൊരു 

രസതന്ത്രമുണ്ട് .

എത്ര  വളർന്നു  പന്തലിച്ചാലും 

തളർത്താൻ  വീര്യമുള്ളത് .

എങ്ങിനെ  വെട്ടി നിരത്തിയാലും 

തളിർക്കാൻ 

പ്രാപ്തിയുള്ളത് .

വാക്‌സിൻ 

ഒരുപാട്  നാളത്തെ 
പ്രാർഥനക്കും 
വേദനക്കുമൊടുവിൽ 
കൊറോണക്കൊരു 
വാക്‌സിൻ 
പിറന്നു  .

ലോകം 
ആ തിരുപ്പിറവിയെ 
ഇരുകയ്യും  നീട്ടി 
സ്വീകരിച്ചു  .

മഹാമാരിയുടെ 
രക്തസാക്ഷികളപ്പോൾ 
നക്ഷത്ര ശോഭയുള്ള 
ആത്മാക്കളായി  .

പറയാൻ .......... ബാക്കിവച്ചത് ;
ചെയ്യാൻ ......... ബാക്കിവച്ചത്
നിങ്ങളിലൂടെ  പൂവണിയണമെന്ന് 
ജീവനുള്ള  ഓരോമനുഷ്യനേയും 
ആശീർവദിച്ചു  .


പിന്നെ 
ഒരു  പുതിയ ലോകമായി.
 .
"ഇനിമുതൽ  ഞാനില്ല .......നമ്മളേയുള്ളൂ'  വെന്ന് 
തെരുവിലുള്ളവരോട് 
കരുതിയ 
അതേ  കരുണയിൽ .

ആളുകൾ  മറനീക്കി  പുറത്തിറങ്ങി  .

തമ്മിൽ  കാണാതെ 
അണകെട്ടിയ  വികാരങ്ങളെ 
ആർപ്പുവിളികളോടെ 
ആലിംഗനം  ചെയ്തു .
 .
സംശയത്തിന്റെ 
മുൾമുനകളെ  
നുള്ളി 
ദൂരെയെറിഞ്ഞു  .

അതിരുകൾ 
അലിഞ്ഞില്ലാതായി  .

നിശ്ചലമായതെല്ലാം 
ചടുലവും 
സു താര്യവുമായി.

പിന്നെ 
നമ്മളെല്ലാം  മറന്നു 

സാനിറ്റൈസറിന്റെ 

സ്ഥാനത്ത്  തോക്കുകൾ 

വാതോരാതെ  ശബ്ദിച്ചു .

അതിരുകളിൽ  നിന്ന്  അതിരുകളിലേക്ക് 

ചോരച്ച് .................ചോരച്ച്

വിഷം  തുപ്പി 

 .

സ്വാതന്ത്ര്യം 

ആർക്കും
സ്വാതന്ത്രമില്ലാതാകുമ്പോൾ
സ്വാതന്ത്രമില്ലായ്മക്കൊരു
സ്വാതന്ത്ര്യമുണ്ട് .

അപ്പൊ
ചിലർക്കുള്ളതും
മറ്റുചിലർക്കില്ലാത്തതും  
തന്നെയാണ് 
ശരിക്കുള്ള
പ്രശ്നം .

വീട് 

സാധ്യതകളുടെ  നേർത്ത വിടവുകൾ 

പരതുമ്പഴും 

ബാധ്യതകളുടെ  ഭാരിച്ച  വേദനപേറി 

തോറ്റുപോകയല്ലായിരുന്നോ 

നമ്മുടെ  പ്രണയം .

ഓർക്കുന്നുണ്ടോ ??

തിരക്കുകളാൽ  ചവിട്ടിമെതിക്കപ്പെട്ട 

നിന്റെ  ഇരുട്ടുകളിൽ 

നിശാഗന്ധിയായ്  ഞാൻ 

വിടരാറുണ്ടായിരുന്നു 

ചിലപ്പോഴെങ്കിലും .

അറിഞ്ഞിരുന്നോ ???

എത്രകള്ളങ്ങളിൽ 

ഉടക്കിമുറിഞ്ഞിട്ടാണ് 

നിന്റെ  

എകാന്തതയിൽ 

ഞാനന്ന് 

നിറഞ്ഞുകവിഞ്ഞത് .

നിന്നോളം 

മറ്റാരെയും 

പ്രണയിച്ചില്ലെന്നു 

ഇതൾവീശിയത് .

വീടെ 

നീയും 

ഞാനും 

മാത്രമാകുന്ന 

സുന്ദരനിമിഷങ്ങൾക്ക് 

എത്ര  ലീവുകളോടാണ് 

ഞാൻ 

സമാധാനം 

പറയേണ്ടി  വന്നിട്ടുള്ളത് .

അവിശ്വാസം 

പീഢിപ്പിച്ചതായിരിക്കല്ലേ..............അച്ഛനായിരിക്കല്ലേ 
എന്നു  പ്രാർത്ഥിച്ച് 
ഏറെനാൾ കഴിയും  മുമ്പ് 

കൊന്നതായിരിക്കല്ലേ .................
അമ്മയായിരിക്കല്ലേ 
എന്നൊരു  നോവ് 
പിറന്നു വീണു .

പ്രണയിക്കാനറിയാത്തവന്റെ  
പ്രണയം 
അനുഭവിക്കാനറിയാത്തവന്റെ 
രതിയോട് 
കൊഞ്ഞനം  കുത്തുന്നു .

ചോദ്യങ്ങൾ   വാ കീറും  മുമ്പ് 
ഉത്തരങ്ങളാൽ 
കവർച്ച  ചെയ്യപ്പെടുന്നു .

അവിശ്വസിക്കാതിരിക്കാൻ 
നമ്മൾ 
പാടുപെട്ട് 
പരാജയപ്പെട്ടുകൊണ്ടേ യിരിക്കുന്നു .

സഹായം 

സത്യത്തിൽ  നമ്മൾ 
ദൈവങ്ങളോട്   തന്നെയാണ് 
സഹായമഭ്യർത്ഥിക്കേണ്ടത് .

കണ്ടില്ലേ 
ദൈവഭവനങ്ങൾ 
എത്ര 
സമ്പന്നമാണ് .

വൈകല്യം 

ചില 

എഴുത്തുകളുണ്ട് 

അംഗവൈകല്യം 

ബാധിച്ച  കുട്ടികളെപ്പോലെ 

നമ്മുടെ 

ദുരഭിമാനത്തിൽ 

പുറംലോകം 

നഷ്ടപ്പെട്ടവ .

അതൊക്കെയൊരു  കാലം 

ക്ലാസ്  കട്ടീത്  
സിനിമക്ക്പോണ  ചുള്ളന്മാരെ 
ചൂരലോണ്ട്  വന്ന് 
തടഞ്ഞുവച്ച് 

"വണ്ടീടെ  ലൈറ്റ്  കത്ത്ണ്‌ണ്ട് 
ഓഫാക്കിപ്പൊയ്ക്കോ "ന്ന് 
ഉപദേശിച്ചിരുന്ന 
ഒരു 
ചങ്ക്  മാഷ് ണ്ടാർന്നു മ്മക്ക് 

അതൊക്കെയൊരു  കാലം .

                                                                   സമീറ.പി.പി  9526298949 
അ.........താണ് .

ആരും  നിർബന്ധിക്കാതെ 
ചെയ്യുന്ന  ജോലിക്ക് 
പറഞ്ഞറിയിക്കാനാവാത്തൊരു 
ആനന്ദമുണ്ട് ;
പറമ്പിലെ  കരിയിലകൾ 
തൂത്തുവാരുമ്പോൾ 
എനിക്ക്  കിട്ടുന്നപോലത്തെ 
എന്തോ 
ഒന്ന് .

"ഇങ്ങനെ പുതച്ചുറങ്ങല്ലെടാ  എണീക്കെ"ന്നു 
മണ്ണോട്  മരം 
നഗ്നമായോതി 
വേരാൽ  പടർന്നു 
തുടരുന്നത് ,

"ഞാനിതാ  നിനക്കുമുമ്പിൽ തലകുനിക്കു'ന്നെന്നു 
പ്രകൃതിയോട് 
കുമ്പിടുന്നത് .

ചീഞ്ഞാലും  കരിഞ്ഞാലും 
വളമാകാതെ 
തരമില്ലെന്നു 
മതങ്ങളി ലേക്കൊരു 
കാറ്റുലയുന്നത് .

തെറ്റിദ്ധരിക്കല്ലേ 
എന്തെങ്കിലുമൊക്കെ 
ചെയ്യണമെന്നുണ്ടെങ്കിൽ  
നാലാൾ  കാണുന്നിടത്താകുന്നതല്ലേ 
അതിന്റെ  ഒരു 
ഇത് .