ലൈവ് 

അവൾ വെബ്ബിനാറിൽ 

ലൈവാണ് .

അല്ല  

  അവൾ വസ്ത്രങ്ങൾ 

ഇസ്തിരിയിടുകയാണ് 

നോക്കൂ 

ആ  വെളുത്ത  കസവുസാരി

 എത്ര പ്രയാസപ്പെട്ടാണവൾ   

മടക്കിയൊതുക്കുന്നത് 

അലമാരയിലേക്ക്  വലിഞ്ഞു  നീണ്ട് 

അടുക്കി  വക്കുന്നത് .

.

അവൾ  വെബ്ബിനാറിൽ  ലൈവാണ് 

അല്ല  

 അവൾ കുഞ്ഞിന്  മുലയൂട്ടുകയാണ് 

ആരാണിത്ര  മര്യാദയില്ലാതെ  അവളെ 

ഒച്ചവച്ചു  വിളിച്ചുകൂവുന്നത് 

അവൾ  വെബ്ബിനാറിൽ  ലൈവാണ് 

അല്ല 

നാളെകളെ  നുറുക്കി 

വറുത്ത് 

പുഴുങ്ങി യെടുക്കയാണ് .

അവൾ  ഇന്നിലല്ല 

നാളെയിലാണിപ്പോൾ 

അവൾ 

അവളല്ല 

നമ്മളൊക്കെത്തന്നെയാണ് .

അവൾ  വെബ്ബിനാറിൽ  ലൈവാണ്

അല്ല 

അവളുടെ  ഭർത്താവ്  അവളെ 

പ്രണയത്താൽ  ഉമ്മ വെക്കുകയാണ്‌ 

ഇപ്പോൾ 

ഇപ്പോൾ  മാത്രം 

അവൾ  ഇന്നിൽ  ജീവിക്കുന്നു .

വെബ്ബിനാർ  അവളാൽ  ലൈവാകുന്നു .

ഞാനെന്റെ  ഇണയെ  ഇത്രമനോഹരമായി 

ഇന്നേവരെ  ചുംബിച്ചിട്ടേയില്ലല്ലോ 

ഒരു  ചുവന്നതെറ്റാൽ 

വീഡിയോകളുടെ  ലൈറ്റണയുന്നു .

ഇന്നിൽ  ജീവിച്ച് 

ഇപ്പോൾ  ജീവിച്ച് 

ലൈവുകൾ 

ശരിക്കും 

ലൈവാകുന്നു .